शेतकऱ्यांसाठी शासनाकडून विविध सोयी-सुविधा उपलब्ध करून देण्यात आलेल्या आहेत. यामध्ये प्रामुख्याने ठिबक, सिंचन तुषार सिंचन, सोलरपंप, अनुदानावर बी-बियाणे वाटप आणि इतर विविध उपकरण अनुदानावर वाटत यांचा मुख्य समावेश आहे. यामधील अशाच एका उपकरणासाठी शासनाकडून अनुदान देण्यात येतं. ती म्हणजे कडबा कुटी मशीन अनुदान होय. कडबा कुटी मशीनसाठी सबसिडी किती? कागदपत्र कोणती व अर्ज कसा करावा ? याबद्दल आपण सदर लेखात माहिती पाहुयात.
कडबा कुटी मशीन अनुदान योजना
शेतकऱ्यांना विविध काम करत असताना एखाद्या विशिष्ट कामासाठी सहज व सोयीस्करपणा यावा हा उद्देश लक्षात ठेवून शासनाकडून कडबा कुट्टी यंत्र खरेदीसाठी अनुदान योजना सुरू करण्यात आलेली आहे. ग्रामीण भागात शेतकरी किंवा पशुपालक गाई, म्हशी, शेळ्या किंवा इतर पशुंचं मोठ्या प्रमाणावर पालन करत असतात. गाई, म्हशी, शेळ्या किंवा इतर पशुंसाठी खाण्याचा चारा लागतो. खाण्याचा चारा किंवा गवत कापताना पशुपालकांना काबाडकष्ट करून जनावरांच्या खाण्याची सोय करावी लागते.
शेतकऱ्यांची हीच अडचण लक्षात घेता गुराढोरांचा, जनावरांचा चारा कडबाकुट्टी मशीनच्या साह्याने एकदम कमी वेळेत व सोयीस्कर पद्धतीने कापता येतो. हाच विचार करून कडबा कुट्टी मशीनसाठी शासनाकडून जवळपास 20 हजार रुपयापर्यंत लाभार्थ्यांना अनुदान दिले जाते. कडबा कुटी मशीनचे अनेक फायदे आहेत.
कडबा कुटीसाठी सबसिडी किती?
कडबा कुटी मशीनची साधारणता किंमत बाजारपेठेत 10,000 रुपयापासून ते 40,000 रुपयापर्यंत आहे. कडबा कुटी मशीनची किंमत शेतकऱ्यांच्या जनावरांची क्षमता कडबा कटिंग स्पीड म्हणजेच मशीन किती एचपीची आहे? 3HP, 5HP यावरती ठरवली जाते. याचप्रमाणे कडबा कुट्टी मशीनमध्ये दोन प्रकारच्या मशीन आढळून येतात. ज्यामध्ये कडबा कुटी मॅन्युअल मशीन व कडबा कुटी ऑटोमॅटिक मशीन यांचा समावेश आहे.
मॅन्युअल मशीन स्वस्त असतात, तर याउलट ऑटोमॅटिक मशीन महाग असतात; कारण यामध्ये इलेक्ट्रिक मोटर बसवलेली असते. कडबा कुट्टी मशीनसाठी अनुसूचित जाती आणि जमाती महिला आणि अल्प व अत्यल्प भूधारक शेतकरी यांच्यासाठी कमाल मर्यादेच्या 50 टक्के अनुदान देण्यात येईल अथवा 20 हजार रुपयापर्यंत अनुदान देय असेल.
अर्जासाठी आवश्यक कागदपत्रे (Documents)
कडबा कुट्टी मशीन अनुदान योजनेचा लाभ मिळवण्यासाठी संबंधित अर्जदारांकडे खालील महत्त्वाची कागदपत्र असणे आवश्यक आहे.
• शेतकऱ्यांचा आधारकार्ड
• बँक पासबुक झेरॉक्स
• जातीचा दाखला (आवश्यक असल्यास)
• जमिनीचा सातबारा उतारा
• जमिनीचा 8अ उतारा
• शेतातील पिकांची माहिती
• GST बिल, कोटेशन, हमीपत्र, करारनामा (लॉटरी पद्धतीने निवड झाल्यानंतर)
कडबा कुट्टी मशीनसाठी ऑनलाईन अर्ज कसा करावा ? Chaff Cutter Online Application
कडबा कुटी मशीन अनुदान योजनेअंतर्गत ऑनलाईन अर्ज करण्यासाठी शेतकऱ्यांना शासनाकडून तयार करण्यात आलेल्या महाडीबीटी फार्मर पोर्टलवरती नोंदणी करावी लागेल. नोंदणी करताना अर्जदाराची संपूर्ण माहिती कागदपत्र इत्यादी भरून अंतिम अर्ज दाखल करावा लागेल. त्यानंतर लॉटरी पद्धतीने निवड होऊन शेतकऱ्यांना कृषी सहाय्यक व कृषी अधिकारी यांच्याकडून पडताळणी केल्यानंतर अनुदान देण्यात येईल.
कडबा कुट्टी मशीनसाठी ऑनलाईन अर्ज कसा करावा ? : Chaff Cutter Online Application Process
शेतकरी मित्रांनो, सर्वप्रथम तुम्हाला कडबा कुट्टी मशीन अनुदानाचा लाभ मिळवण्यासाठी तुम्हाला MahaDBT Farmer Portal ला भेट द्यावी लागेल. त्या ठिकाणी नवीन नोंदणी करून कृषी यांत्रिकीकरण या घटकांतर्गत खालीलप्रमाणे अर्ज करावा लागेल.
• महाडीबीटी पोर्टल वर नोंदणी करून लॉगिन केल्यानंतर तुमच्यासमोर अर्ज करा असा पर्याय दिसेल त्या पर्यायावर क्लिक करा.
• त्यानंतर तुमच्यासमोर तीन उपघटक दिसतील, कृषी यांत्रिकीकरण, सिंचन साधने व सुविधा, फलोत्पादन. यापैकी कृषी यांत्रिकीकरण या समोरील बाबी निवडा या बटणावर क्लिक करा.
• आता योजना निवडण्यासाठी मुख्य प्रक्रिया सुरू होईल या ठिकाणी अशाप्रकारे पर्याय निवडा. कृषी यंत्र अवजारांच्या खरेदीसाठी अर्थसहाय्य > मनुष्य चलित अवजारे > फॉरेज ग्रॉस अँड स्ट्रॉ / रेसिडू मॅनेजमेंट (कटर/श्रेडर) > चाफ कटर
• वरीलप्रमाणे पर्याय निवडल्यानंतर जतन करा या बटणावर क्लिक करा.
• जर तुम्ही नवीन शेतकरी असाल व नोंदणी करून सर्वप्रथम कृषी यांत्रिकीकरण या घटकांतर्गत अर्ज करत असाल तर तुम्हाला २३.६० पैसे इतकी रक्कम ऑनलाईन पद्धतीने भरावी लागेल.
• जर तुम्ही यापूर्वी कृषी यांत्रिकीकरण या घटकांतर्गत अर्ज केलेला असेल, तर तुम्हाला कोणत्याही प्रकारचा शुल्क लागणार नाही.
अशाप्रकारे एकदम सोप्या पद्धतीने तुम्ही तुमच्या जनावरांचा चारा कापणीसाठी व सोयीस्कर पद्धतीने चारा कापता यावा यासाठी शासनाकडून देण्यात येणाऱ्या कडबा कुट्टी मशीन अनुदानाचा लाभ घेऊ शकता. मित्रांनो आमच्यामार्फत देण्यात आलेली माहिती, जर तुम्हाला आवडली असेल, तर तुमच्या मित्रांपर्यंत नक्की पाठवा.
