ITI Admission 2024 : राज्यातील सरकारी आणि खासगी औद्योगिक प्रशिक्षण संस्थेत (आयटीआय) डिप्लोमा प्रवेशासाठी राबविण्यात येणाऱ्या ऑनलाइन प्रवेश प्रक्रियेला सोमवारी ३ जूनला सुरूवात झाली असून, विद्यार्थ्यांना ३० जूनपर्यत ऑनलाइन पद्धतीने अर्ज सादर करता येणार आहे. आयटीआयच्या शिक्षणानंतर रोजगाराच्या संधी लवकर उपलब्ध होत असल्याने, अनेक विद्यार्थी आयटीआयला प्रवेश घेत असल्याचे चित्र आहे.
व्यवसाय शिक्षण आणि प्रशिक्षण संचालनालयाकडून (डीव्हीईटी) आयटीआय डिप्लोमा अभ्यासक्रमाची प्रक्रिया राबविण्यात येते. याबाबतच्या प्रवेश प्रक्रियेचे वेळापत्रक डीव्हीईटीचे संचालक दिगंबर दळवी यांनी प्रसिद्ध केले आहे. त्यानुसार यंदा प्रवेश प्रक्रियेला सुरूवात झाली आहेत. दहावीनंतर अकरावी किंवा डिप्लोमा इन इंजिनीअरिंगला अभ्यासक्रमाला प्रवेश न घेणारे विद्यार्थी, आयटीआय चा पर्याय निवडतात. अशा विद्यार्थ्यांची संख्या मोठी असते. डीव्हीईटीने प्रसिद्ध केलेल्या वेळापत्रकानुसार नियमित चार फेऱ्या आणि त्यानंतर संस्थास्तरीय प्रवेश फेरी होणार आहे.
विद्यार्थ्यांनी वेबसाइटहून ऑनलाइन पद्धतीने अर्ज भरल्यानंतर, ५ जून ते १ जुलै या कालावधीत विद्यार्थ्यांना जवळच्या आयटीआयमध्ये जाऊन कागदपत्रांच्या पडताळणी करून, आपला प्रवेशाचा अर्ज निश्चित करायचा आहे. प्रवेश अर्ज निश्चित झाल्यानंतर, ५ जून ते २ जुलै या कालावधीत विद्यार्थ्यांना आयटीआय संस्थांचे पर्याय भरायचे आहेत. त्यानंतर प्राथमिक गुणवत्ता यादी ४ जुलै रोजी सकाळी ११ वाजता प्रसिद्ध केली जाणार आहे. या यादीबाबतचे आक्षेप विद्यार्थ्यांना ४ आणि ५ जुलै रोजी नोंदवता येतील. त्यानंतर अंतिम गुणवत्ता यादी ७ जुलैला प्रसिद्ध करण्याक येईल. प्रवेशाची निवड यादी १४ जुलैला प्रसिद्ध झाल्यानंतर, १५ ते १९ जुलै या कालावधीत विद्यार्थ्यांना प्रवेश मिळालेल्या संस्थेत जाऊन कागदपत्रांची पडताळणी करायची आहे. त्यानंतर आपला प्रवेश निश्चित करायचा आहे.
प्रवेशाच्या दुसऱ्या फेरीला १५ जुलैपासून सुरूवात होणार आहे. विद्यार्थ्यांनी प्रवेश प्रक्रियेच्या सविस्तर माहितीसाठी खालील बेबसाईडला भेट द्या.
